Fenasol موقع تابع للاتحاد الوطني لنقابات العمال والمستخدمين في لبنان يعنى بمشاكل العمال اللبنانين والاجانب
مقالات مشابهة
حدا يقنعنا إنو منا عايشين بمزرعة؟
زياد عيتاني عميل وبيطلع بريء ومركبلو ملف
سوزان متورطة بس منعملا إحتفال لما بتضهر وما حدا بيعرف كيف وليش
منعرف من الاعلام إنو تجنس سوريين وفلسطينيي وكم واحد زيادة لأنهم رجال اعمال
مدير عام بيحصل على 112 مليون راتب ومخصصات بشهر واحد والبلد مأفلس
منطالب بتدقيق مالي وبالآخر بيختفي الابراء المستحيل وما حدا بيعرف كيف
منقر الموازنة بدون قطع الحساب للسنين السابقة ومنخالف الدستور
منعتمد موردين لمؤسسات الدولة بدون إشراف مديرية المناقصات
منعين 30 و 32 وزير ببلد مأفلس مساحتو قد منطقة بالصين او كندا
منعمل إنتخابات وبتتمشى الصناديق عالطرقات وبتتبدل بدون حسيب او رقيب
بيطلع عبد المنعم يوسف بريء وبيربح الدعوى على الدولة مع انو الكل كان معتبرو حرامي
منعطي درع تكريمي ل ميسرة سكر بعد ما كنا نتهموا مع سوكلين بالفساد والسرقة
منعمل الصهر معاق تنزدلو تعويضو
منرجع نتدين تنرجع نسرق
منعطي زودة لموظفي سكك الحديد وما في سكك حديد
مندفع 782 الف دولار رواتب لوزراء الدولة والدولة فارطة إقتصادياً
شبابنا بينتحروا بأعداد كبيرة وما حدا بيسأل ليش
بسافروا مسؤولينا بطيارات خاصة ليتدينو بينما مسؤولي الدول اللي عم بتدينا بسافروا عالدرجة الاقتصادية
بلدية بعلبك بتركب ريغارات مسروقة من بلدية الشويفات
منوقف إستيراد الثياب من تركيا تنسكر بواب رزق زغار التجار الافراد ونقوي حيتان التجارة
منخطط لنقل شاكيرا بطيارة الجيش من المطار للارز تنوفر وننجح مهرجان سياسي مغلف بالفن
منحرق زبالة بمكبات عشوائية تنسمم الجو وما نعمل معامل فرز
منقر سلسلة ب 1700 مليار ليتبين انو ممكن تتجاوز 2800 مليار
منشيل بسطات الناس اللي بلا شغل عن الطرقات لترجع تتركب بعد كم يوم بحماية الشبيحة
بتأفلس الشركات وبتنسرق الناس والحرامي بيهرب عبر المطار
بتطلع تنكة البنزين من 22 الف لحوالي 30 الف وبيبقى الحد الادنى 675 الف
جماغة الحزب بسبوا اميركا وبعلموا ولادهم فيها او بالجامعة الاميركية ببيروت
منطالب بفصل النيابة عن الوزارة ومنعين نوابنا وزرا
منقول ما معنا دولار بجيبتنا وقت الانتخابات ومنروح نحضر الفوتبول بالدرجة الاولى بأوروبا
منعمل وزارة لمكافحة الفساد ببلد الفساد وما منكمش ولا حرامي…
والقصص بتكمل وما بتخلص!!
طيب كيف؟ إنو بجزر الماو ماو والبانانا ريبابليك مش هيك…
خلينا نعلنها مزرعة ونرتاح بقى!
هلقد بحبك يا لبنان
جيلبير يونس
1 حزيران 2018
